Rammagerðin fagnaði tveggja ára afmæli verslunarinnar í Hörpu í desember 2023. Þar sem hönnunarhappdrættið árið áður heppnaðist vel var ákveðið að endurtaka leikinn. Dagskráin var fjölbreytt og skemmtileg.
Í tilefni útgáfu Frasabókarinnar sem fæst í Rammagerðinni komu höfundar bókarinnar, Emil og Eyþór á svæðið og lásu upp nokkra vel valda frasa fyrir gesti. Þeir ákváðu að velja sérstaklega frasa til að auka heppni gesta í happdrættinu svo sem "Hver er sinnar gæfu smiður".
Berglind Festival var happdrættisstýra og gerði það af mikilli snilld eins og henni einni er lagið, enda þekkir hún íslenska hönnun og vörur Rammagerðarinnar vel.
Emmsjé Gauti hannaði bol í samstarfi við Rammagerðina sem kom í verslanir í lok nóvember. Gauti mætti á svæðið og kynnti bolinn og söng nokkur lög.
Mikil gleði var á svæðinu og fengu alls 25 aðilar vinning í hrappdrættinu. Í vinning voru 25 vörur frá Rammagerðinni, ýmist íslensk ullarteppi, Frasabókin, húðvörur, ilmvötn, fatnaður og margt fleira.
